Gara-gara Resuffle

Udin: Sundelan banget dah! dari tadi acare nih tipi mukenye presiden mulu!

Juki: Yaelah santai aje ngape, Din!, mending lu bikin kupi kite ngobrolin nyang laen!

Udin: Gua sih kagak masaleh mao ganti menteri seribu kali juge gua jabanin, juk! tapi pan keadaan kite tetep aje ngeblangsak begini…

Juki: Iye juge sih… abisan mao gimane lagi, lah presiden kite nyang katenye tukang ngambek ame demen banget ngace ntuh pan demen banget nyang namenye resuffle. Bener kagak tuh ucapan gua? haha

Udin: Lu tau kagak, mase keponakan gua pas ditanye name-name menteri die kagak ngarti! kate die mendingan nonton cangcuter cing!, begono katenye. Gile banget kagak ntuh..

Juki: haha parah banget Din ponakan lu, emang lu jejelin apaan? haha

Udin: Ah! Cande aje lu, serius nih gua. Dulu pas kite sekole, kite gampang ngapalin presiden ame name menterinye pan, soalnye dulu jarang menteri nyang diganti, presidennye pinter milih pembantunye walopun akhirnye presiden nyang dulu2 ade kagak benernye juge. tapi kalo presiden kite sekarang demen banget cari sensasi. Jadinye pan anak-anak sekolahan kagak kenal menterinye. Lah diganti-ganti mulu kapan ngapalinnye…

Juki: bener juge kate lu din, dulu jangankan name, tuh muke menteri aje kite tau

Udin: nah pan lu paham… ponakan gua lebih kenal ame anggotanye cangcuter daripade ame menterinye. tiap ari maen internet mulu…nyang dibuke pesbuk mulu… kacau dah anak jaman sekarang, eh pemerintehnye nyang kacau

Juki: haha… eh ngomong2 kupinye mane nih? asem mulut gua, mending kite ngomongin Rohane aje nyok!

Udin: ah sialdangkalan emang lu, perempuan mulu

Juki: haha daripade puyeng ngomongin SBY ame menterinye mending nyeruput kupi… ame rutinye din jangan lupa, dicocol enak tuh hehe

Tags: reshuffle --

Tidak ada komentar:

Posting Komentar

Silahkan Tinggalkan Pesan dan Komentar Anda di Sini